Ս.թ. դեկտեմբերի 20-ին Երևանում տեղի ունեցավ Միգրացիոն քաղաքականության մշակման միջազգային կենտրոնի (ICMPD) նախաձեռնած «Ճամպրուկ 2016» լրագրողական մրցույթի արդյունքների ամփոփումը և մրցանակների հանձնման արարողությունը: Մրցույթը կազմակերպվել էր ԵՄ կողմից ֆինանսավորվող «Աջակցություն Հայաստանին միգրացիայի և սահմանների կառավարման ոլորտներում» (ՄԻԲՄԱ) ծրագրի շրջանակներում:

«Ճամպրուկ 2016» լրագրողական մրցույթին մասկանցության հնարավորություն է ընձեռնվել ՀՀ բոլոր մարզերում և մայրաքաղաքում գործող ԶԼՄ-ների ներկայացուցիչներին և անկախ լրագրողներին, ում առաջարկվել է ներկայացնել միգրացիայի և սահմանների կառավարման, ապաստանի, ՀՀ քաղաքացիների Հայաստան վերադարձի, վերաինտեգրման և առևտրի դյուրացման վերաբերյալ 2016 թ. ընթացքում հեռարձակված հեռուստա- և ռադիոհաղորդումները, տպագիր ու առցանց մամուլում տեղ գտած հրապարակումները: «Ճամպրուկ 2016» լրագրողական մրցույթի հիմնական նպատակն է Երևանում և Հայաստանի մարզերում միգրացիային և սահմանների կառավարմանն առնչվող խնդիրների վերհանումն ու լուսաբանումը, դրանց ազդեցությունը առօրյա կյանքի վրա, վերհանված խնդիրների վերաբերյալ հանրության իրազեկվածության բարձրացումը և լրագրողական աշխատանքի խրախուսումը: «Ճամպրուկ 2016» լրագրողական մրցույթը եզրափակեց ՄԻԲՄԱ ծրագրի կողմից իրականացված լրագրողների կարողությունների բարձրացմանն ուղղված միջոցառումները, որոնց ընթացքում տեղի ունեցան մի շարք ճանաչողական այցեր Գեղարքունիքի և Սյունիքի մարզեր և միգրացիոն հարցերի լուսաբանմանն ուղղված վերապատրաստման դասախոսություններ: «Ճամպրուկ 2016» լրագրողական մրցույթն անց է կացվում արդեն 7 տարի, սակայն առաջին անգամ է կազմակերպվում ՄՔՄՄԿ կողմից:

Մրցանակների հանձնման արարողությանը բացման խոսքով հանդես եկան ՄԻԲՄԱ ծրագրի ղեկավար Կարել Հոֆսթրան և ՀՀ ՏԿԶՆ միգրացիոն պետական ծառայության պետի տեղակալ ԻրինաԴավթյանը:
Միգրացիոն քաղաքականության մշակման միջազգային կենտրոնի, Միգրացիոն պետական ծառայության, գործընկեր կազմակերպությունների ներկայացուցիչների և 2 անկախ փորձագետներից կազմված ժյուրին մանրամասն ծանոթացել է ներկայացված աշխատանքներին: Ժյուրին ընտրություն է կայացրել՝ հիմք ընդունելով ոճային, կառուցվածքային և բովանդակային չափանիշները: Մրցույթը հայտարարվել էր երեք անվանակարգերում՝ տպագիր լրագրություն, հեռուստալրագրություն և ռադիոլրագրություն:

Տպագիր մամուլ

  1. Երանուհի Սողոյան, «Հետք», «Գյումրեցի տենոր Արտակ Կիրակոսյան»
  2. Նազելի Գրիգորյան, «Նյումագ», «Սեզոնային երջանկություն»
  3. Լուսինե Բադալյան, «Առավոտ» օրաթերթ, «Վերադարձած միգրանտներին բիզնեսի տեր են դարձնում, հմտություններ սովորեցնում, որ հայրենի հողում մնան»

Հեռուստամամուլ

  1. Քրիստինե Ոսկանյան, ԱՐ հեռուստաընկերություն, «Հայրենադարձություն»
  2. Սուսան Բադալյան, Հանրային հեռուստատեսություն, «Պատերազմի դեմքը»
  3. Տիգրան Հովակիմյան, Քյավառ հեռուստաընկերություն, «Խոպանը՝ կենսակերպ»

Ռադիոլրատվություն

  1. Արմինե Գևորգյան, Հանրային ռադիո, «Մեկ խնդիր՝ տարբեր ճակատագրեր»
  2. Ալիսա Գևորգյան, Հանրային ռադիո, «Գերմանիայի փոխարեն ընտրեց Գեղամա լեռները»
  3. Ռուզան Գիշյան, «Ազատություն» ռադիո, «Սիրիահայ. «Հա՛մ ուզում եմ մնամ, հա՛մ չմնամ»

Որպես մրցույթի գործընկեր կազմակերպություններ հանդես եկան ՅՈՒՆԻՍԵՖ-ի հայաստանյան ներկայացուցչությունը, «Վերադարձ Հայաստան» հիմնադրամը, «Հանրային դիվանագիտություն» ՀԿ-ն, «Հայկական Կարիտաս» կազմակերպությունը և «Save the Children International» հայաստանյան ներկայացուցչությունը՝ շնորհելով իրենց մրցանակները լրագրողական լավագույն աշխատանքներին հետևյալ անվանակարգերում՝ «Միգրացիայի ազդեցությունը ընտանիքների և երեխաների վրա», «Հայրենադարձություն թեմայով լավագույն նյութ», «Ներգաղթած սիրիահայերի ինտեգրում. հայաստանյան իրականություն», «Դժվարություններ հաղթահարած վերադարձողի ինտեգրման հաջողված պատմություն» և «Տեղահանված երեխաների խնդիրների շուրջ լավագույն նյութ»: Հատուկ մրցանակներ ստացան Գայանե Միրզոյանը (chai-khana.org), Լիլիան Գալստյանը (www.panorama.org), Քրիստինե Ոսկանյանը (ԱՐ հեռուստաընկերություն), Հասմիկ Դիլանյանը (Հանրային ռադիո), Արմինե Ավետիսյանը (1in.am), Հասմիկ Հարությունյանը (Արմենպրես), Անուշ Խաչատրյանը (Հանրային հեռուստաընկերություն), Հրայր Թամրազյանը (Ազատություն ռադիոկայան):

Ընդհանուր առմամբ մրցույթին ներկայացվել է 95 նյութ, որից 54-ը ՝ տպագիր, 19-ը՝ հեռուստատեսային և 22-ը՝ ռադիո:

Ներբեռնել

Ծրագրի մասին պատմող տեղեկատվական թերթիկը EN AM

Կոնտակտներ

ՄՔՄՄԿ կենտրոնական գրասենյակ

Ավստրիա, Վիեննա,1010
Գոնզագեգասսե 1
Հեռ. +43 1 504 4677 0
Ֆաքս +43 1 504 4677 2375

ՄՔՄՄԿ-ն Հայաստանում

ՀՀ, Երևան, 0010,
Վ.Սարգսյան փ. 26/1
՞Էրեբունի Պլազա՞ բիզնես կենտրոն, գրասենյակ 711
Հեռ. +374 10 520388

Էլ.փոստ Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։

Facebook